Симона Николова е 28-годишна девојка од Скопје. Ретката болест Фридрајхова атаксија ја спречила да студира откако завршила средно образование
Нејзиниот сон е да стигне до Холивуд. Ретката болест ја спречила да студира режија, но таа сепак не се откажува – пишува сценарија, објавува книги и сонува да чекори на црвениот килим. Симона Николова е 28-годишна девојка од Скопје. Ретката болест Фридрајхова атаксија ја спречила да студира откако завршила средно образование.
– Љубовта кон пишувањето ми се роди на 16 години кога за прв пат напишав краткометражно сценарио. Имав желба да студирам режија, но животот ми зададе големи препреки. Досега имам објавено шест книги, кои на англиски јазик се објавени на платаформата „Амазон“ – ја почнува Николова својата приказна.
Симона Николова
Пишува сè. Ја инспирираат многу работи, а најмногу филмови и латино-серии што ги гледа секојдневно. Инспирирана од нив, креира сопствени светови. Вели дека секогаш е креативна и сè што прави, прави со љубов. Симона објаснува дека не е едноставно млад автор да се пробие и да почне да објавува свои дела.
– Тешко е, посебно за тие што имаат здравствени проблеми како мене. Бев одбиена од десетина издавачки куќи и решив да работам самостојно. Истото се случи и со моите сценарија. Не е фер игра тоа, но секако продолжувам напред – вели таа.
Кога имала 8 години ѝ била дијагностицирана Фридрајхова атаксија, ретка болест која е проследена и со дијабетес.
– Не сум дијабетичар како другите бидејќи панкреасот ми е сосема здрав, но неговата функција е стопирана. Фридрајковата атаксија е прогресивна и агресивна болест која освен горните и долните екстремитети го напаѓа срцето, говорот, голтањето и очите. Јас сум среќна што кај мене прогресијата е бавна и нецелосна. Почнав да го губам говорот дури на 23-24 години и освен тоа и телото, добра сум. Се чувствувам супер – вели Николова.
На прашањето каков е животот во Македонија со оваа болест и каква помош добиваат болните од институциите во однос на грижа и нега, таа вели:
– Ќе бидам искрена како и секогаш. Катастрофа е во многу аспекти, особено животот со оваа болест или која тешка болест. Нема да навлегувам во детали, само ќе речам: Срамота! Верувале или не, многу доктори уште не знаат што е оваа болест. Финансиска помош од мизерни 7.000 денари не се од голема помош за никој со сериозна болест. Жално е навистина – вели Симона.
Сепак, оваа состојба не ја обесхрабрува, туку ја поттикнува уште повеќе да работи.
– Ова е дел од мојата судбина и длабоко верувам во тоа. Да не беше овој голем предизвик што ме научи храбро да се борам, немаше да го откријам својот талент. Мојот најголем сон е еден ден да чекорам по холивудскиот црвен килим. И ќе го остварам – вели Симона.
